الدراما كانت محكومة 30 سنة رغم انها لا تنقاد
لو اتعاملنا حسب الطبيعة والواقع ما حنلقي القبول وحنسمع (دي المدنيه العايزنها)!!
(الخرطوم بالليل) مشروع مؤسس ومدروس.. وعلي راسه كوكبة من اميز الكوادر
حوار : ولاء عبدالله عوض
نجمة الدراما السودانية والمسرح اخلاص نور الدين ممثلة متمكنة، قوة الإبداع لديها تتأتى من قوة حضورها وجمالها وموهبتها، أعمالها تصف سمات الواقع السوداني بكل ما فيه من قيم حضارية وإنسانية وبساطه وتلقائيه، استطاعت ان تضع بصمتها في خارطة الدراما السودانيه بجداره تبهرنا دوما بابداعها المتجدد رغم كل الصعاب التي تحيط بالدراما وشح الامكانيات التي يعاني منها الممثل واهمال الدوله للدراما والدراميين، اخلاص صاحبة حضور مميز تربعت في قلب المشاهد السوداني وترسخت في ذهنه في كل شخصية قامت بادائها العفوي وحضورها القريب من القلب، فظلت أعمالها راسخة في وجدان محبي الدراما والمسرح بفضل اتقانها لعملها وقدرتها الأدائية المدهشة، مع تلقائيتها التي ميزتها عند جمهورها، سطع نجمها منذ ولوجها للمجال الدرامي جسدت دور المراه في كل الادوار الاخت والام والزوجة والصاحبة وبت الجيران والنسيبة و(الشلابه) ووجدت حب وقبول كبير من الجمهور تسير بخطى ثابتة وتبهرنا بابداعها في كل اطلاله لها سواء عبر الاعمال التلفزيونية والاذاعيه او علي خشبة المسرح التقيناها في الحوار التالي وخرجنا منها بالحصليه التاليه:
*بداياتك ومنو الوقف معاك وقدمك؟
بداياتي كالعاده الدورات المدرسيه، والوقف معاي الوالد ربنا يرحمو بعد ما واجهت صعوبات وتعاليق من الاهل عن الدراما ودراستها وتخصصت تمثيل وكانت رغبتي ووقف الوالد بجانبي وواجه كل النقد من الاهل
*المشاكل والعراقيل البتواجهك كممثله؟
اي فتاة سودانية محكومة بعادات وتقاليد وهي تحت المجهر فما بالك من تدرس دراما او فنون عامه وكل سلوك محسوب ولازم تكوني مقيدة بالعرف لانو اصلا المجتمع عندو راي فيك فعشان تكسبو ويبادلك الحب والاحترام لازم تكون عند حسن ظنو ولازم تجامل وتتواصل حتي لاتحسب متعالي، دي الصعوبات الهي انك ماملك نفسك ودايما انا بقول الجمهور هو المشغلك وهو مديرك ولازم لازم يرضي عنك.
*حدثينا عن دور النقاد في تجويد الأعمال الدرامية والمسرحية؟
النقد هو مرايتنا ولازم يكون شفاف وصادق المشكله في نقاد اولا مامتخصصين وهم المسؤلين من تطوير العمل الفطير وهدم العمل الناجح بالذات نحن كمجتمع انطباعي وبرضو الحمدلله عندنا كثير من النقاد المتخصصين البدعمو الحركه الدراميه ولا ننسي ان الجمهور والمشاهد العادي اكتر ناقد في الحسبان.
*ما بين الأعمال الدرامية والمسرحية التي قدمتيها هل هناك شخصية قريب لشخصيتك في الواقع؟
دائما بقدم شخصيات بعيده عن اخلاص تماما (المراه الرداحه والشكاله) وانا عكس كدا رغم اني نفسي اكون كدا في الحياة.
ماهو السر في التلقائية والموهبة الكبيرة التي تؤدي بها اخلاص أدوارها؟
بتمني اكون فعلا تلقائيه واقدم مايرضي المشاهد في اي شخصيه وحبي للدراما وعشقي للمسرح لايحدهم حدود انا انسانه معروفه اني (بيتوتيه) وما بتحمس للطلعه من البيت الا لشغلي بكون مبسوطه شديد وبعمل اي شغل بحب لانو الدراما والمسرح بالنسبه لي حياة.
*ما هو الشيء الذي ينقص الدراما السودانية لتنافس عالميا؟
الدراما السودانيه من بعد عام 200 أصبحت تتراجع وتتناقص ولم تنجح محليا، الدوله لها يد في ذلك هنالك مسؤولين يحاولون قيادتها والفن يقود لاينقاد ومافي نقابه ومافي اتفاق ومشاكلها عويصه، لسسسه مرحلة العالميه بدري علينا لكن الامل في مابعد الثوره وننتظر التغير، الشعوب تتقدم بثقافتها والدراما راس الثقافه ولكن للاسف السودان عالميا معروف بالنزاعات والحروب القبليه والاهليه ربنا يحفظ السودان.
*بتلقي نفسك اكتر علي خشبة المسرح ولا التلفزيون ؟
المسرح ابو الفنون اكيييد المسرح اكثر متعه للتعامل مع الجمهور مباشر وبتتعامل مع ناس جاتك مخصوص عشان تشاهدك اما التلفزيون انت بتطل علي الشاشه في البيوت في الحيشاهد صدفه او يشاهد من دون حب بس المسرح جمهور حي اختارك والنقد مباشر
*الدراسة الأكاديمية ودورها فى صقل موهبتك ؟
طبعا مهمه جدا الدراسه لانها بتفتح ليك طريقك الصحيح وتعرف كيف تتعامل مع الموهبه، الكليه ما بتقدم موهبه لكن بتدعمها بالوعي، وادراك خطواتك واحترامك للمهنه ضروريه جدا وبتعلمك ابجديات الدراما وكيف تتعامل مع الديكور الميكب كيف تحلل الشخصيه وتختار ازياءها وطريقه كلامها وحركتها ولغات ولهجات القبايل ولازم تكون ملم بتاريخ مهنتك.
ماهو جديد اخلاص وماذا عن مشاركتك في برنامج الخرطوم بالليل؟
بسبب الكورونا اولا والوضع الامني ثانيا في ركود ملحوظ غير البيات الحاصل للدراما بسبب اشكالات الانتاج اخر تصوير (اكس لارج ج 2) تم تصويرو بمصر وتاني مسلسل (حافة طريق) مع النجم ابوبكر فيصل وهناك مشاريع نسال المولي عز وجل ان تتم ويوفقنا فيها.
برنامج الخرطوم بليل الشي الدفعني ليهو انو متبنيهو شاب مهموم ووجيع بقضايا الثقافه وبفكر بطريقه استراتيجيه ربنا ينولو مقاصدو المنتج هو ياسر ابوالعشره والشجعني اكتر من اعداد بروف اليسع وبمجرد ماطرح لي الفكره وافقت قبل اعرف التفاصيل لثقتي الكبيره وايماني بمعلمي واستاذي والمخرج هو مخاوي والبروف عادل حربي ضمن المشروع ويكفي هذه الاسماء تجعلك تشتغل مغمض عينك.
والفكره بالنسبه لي مختلفه مع اعلاميين قامه احبهم واحب وعيهم وثقافتهم وهو مشروع مؤسس جدا ومدروس ومتعوب عليه وشغالنو في نار هادئة والمنتج مامقص مامقصر ولا بخلان عليهو الفن عموما والاعلام تديهو بديك كل العناصر ماالماديه فقط رغم انو الماديه اهم.
*اخلاص من خلال منشوراتك عبر (فيس بوك) فهمنا انك مطالبه بحقك في الاعمال التي قمتي بادائها .. هل تم اعطاءك كل مستحقاتك الماليه في الاعمال التي قمتي بها ام مازلتي لم تتقاضي اجرك؟
للأسف هناك كثير من اتعابي لم اتقاضاها حتي الان بسبب الوضع العام مما تسبب في عدم اكمال الاعمال وايضا للان مطالبين وزارة الثقافه ولم نتمكن من اخذ باقي مستحقاتنا لتغيير الوزير، ما بتعرفي تشيليها من منو ودي واحده من مشاكل الدرامين يتعاملون بانسانيتهم اكتر فالعاطفه هي المرجعانا.
*اكتر مسلسل عجبك في رمضان السابق واكتر ممثل ابهرك في الاداء؟
بصراحه بسبب مرض الوالدة ربنا يرحمها ويغفر لها لم استطع مشاهدة الدراما التي قدمت في رمضان اذ انها تزامنت مع مرضها ولكن علي كل يستحقو الشكر انهم قدمو دراما ومن خلال راي الشارع والكومينتات في السوشل ميديا انها وجدت قبول وحب من الجمهور ودا مكسب للدراما.
* موقف الدولة من الدراما.. هل في دعم محسوس بعد الثورة؟
علي الاطلاق للان مافي تطوير بل بالعكس مجمده تماما وكان عشمنا كبير في كل المجالات ماالدراما بس الثوره قدمت شباب زي الورد قدمو ارواحهم نتمني دماءهم وارواحهم الغاليه تنولهم ماخرجو لاجله نتمني التغيير وحقوقهم ترجع وربنا يعوض شبابهم الجنه يارب.
*هل في اتجاه لاعادة المسرح المفتوح للجمهور والجولات الولائية ؟
نتمني ذلك ان يعود المسرح المفتوح وتملا السودان مسرحيات في كل ولاياتو نامل ونتمني.
* كيف بتختاري السيناريو البيناسبك.. وهل انتي نمطية في اختيار الشخصيات؟
في سيناريوهات من غير ماتقريها مابكون عندي عليها راي بس الشخصيه بهتم اني اقدم شخصيه مختلفه بالرغم مرات في شخصيات كدا بحبها لو جاتني بعملها حتي لو عملت زيها اما النصوص البكتبوها مؤلفين اول مره اتعامل معاهم لازم اقرا اول حتي احدد حشتغل ولا ما حاشتغل.
*ليه ما فكرتو تدبلجو مسلسلات مكسيكية وتركية بلهجة سودانية؟
شغل الدبلجه اتعمل قبل كدا من المخرج معتصم فضل كان بنتج اعمال اطفال مدبلجه لكن هي فكره جميله اتمني المخرجين ينتبهو ليها وقد تكون تواصل وتبادل ثقافات وتمكن الدول التانيه من مشاهدة الدراما السودانية.
* الدراما السودانية.. نجاح اذاعي فشل تلفزيوني.. ما تعليقك؟
بالضبط دا رايي الشخصي ودايما بقولو الاذاعه غير سحرها وجمالها وانها تعتمد علي شطاره الممثل انو يوصل الصوره عبر السمع وبالاحساس والصوت الجميل وانا بحبها جد، والتلفزيون مرات بلم كل من هب ودب الاذاعه لسه الحمدلله بسلامتها لم يتم غزوها.
* مآخذ على الدراما..ظهور المراة في بيتها مع زوجها وهي بالتوب.. ده ما بيغالط الطبيعة والواقع؟؟
فعلا كانت الدراما محكومه بضوابط وقوانين وكان سبب في تدهورها لان الفن لاينقاد وكان المتلقي بيشكي من ك نفس الاشكاليه دي لكن بمرور الزمن العين اتعودت عليها واظن لو خرجو من المالوف ماحيتم استيعابها بسهوله يعني مثلا في دار المطلقات الانتقادات كلها كانت في الحته دي، وفي الاخر العادات والتقاليد السودانيه بتحتم علينا كدا واذا قلنا نعمل غير كدا في الوقت الحالي الشماعه الاولي للانتقاد حتكون (دي المدنيه العايزنها) افتكر انو المشاهد ماحيتقبل التغيير بالذات من ممثله اشتغلت قبل كدا في المجال ولكن اذا جات وجوه جديده احتمال تلقي القبول زي ماشفنا في مسلسلات تانيه بوجوه جديده.
* الدراما بعيدة عن تناول مشاكل حساسة في المجتمع تحتاج لمن يتحدث عنها.. هل هو خوف ام مقص الرقيب ام المجتمع؟
الدراما محكومه 30 سنه وبعيده عن السياسه وبعيده عن مشاكل كتيره داخل المجتمع السوداني باوامر من السلطات فما كان حتلقي النور لانو في نماذج كتيره اتطرقنا ليها في الدراما وكلها في صميم مشاكل المجتمع بس للاسف منعت من البث ودا كان عائق كبير لانو من الاهداف الاساسيه للدراما هي معالجة القضايا المسكوت عنها وقصة الفن بعالج القضايا دي كانت مرفوضه ومامسموح تناول اي قضيه حساسه عشان كدا الدراما بقت محصوره في قوالب محدده وللاسف المسؤلين البقيمو الماده قبل تتقدم اساسا ماعندهم علاقة بالفن ومابعرفو يعني شنو فن وكان بشوفو تناول النوع دا من الدراما لا اخلاقي رغم انها مشاكل من قلب الشارع السوداني ونحن بنسعي لمعالجتها في قالب درامي ودي طبعا عدم مؤسسيه وبتذكر في عام 2000 عملنا فلم اسمو (خال البنات) بتكلم عن مشاكل البنات والداخليات والسلبيات الفيها بس للاسف اترفض زيو وزي اعمال كتيره ورغم انو الاعمال الزي دي بتلقي قبول عند المشاهد وبدليل من اسباب نجاح وقبول مسلسل سكة ضياع انو اتطرق لقضايا حقيقيه وواقعيه ومعاشه فوجد قبول كبير من المشاهد السوداني .
Comments are closed.